阿美

阿美係三年前使者嘅一個義工。當時佢仲讀緊12班。

佢係一個令我印象好深刻嘅義工。

記得我初初上工，阿美就啱啱開始喺使者做義工，所以其實我哋都係儍吓儍吓咁，不過我話哂都係佢Director吖，所以都要醒佢少少，要帶住佢吖嘛。

其實初時同佢合作，真係有啲炆，因為佢有時都唔係好聽話，又或者應該話，佢有時都唔係好知道自己做緊啲乜。

不過，上帝係大能嘅。

過咗一排之後，我見到阿美嘅工作態度改善咗好多，而佢亦漸漸對使者嘅工作產生興趣。佢會開始同我哋傾計，講有關佢對未來嘅睇法，對讀書嘅擔心同計劃，而佢亦都越來越享受使者所舉辦嘅活動。後來佢更加立定心志相信神，仲加入教會，每星期穩定地返團契同埋崇拜㖭。雖然佢而家無喺使者做義工，不過佢仍然會得閒就返嚟同我傾計，分享生活上需要，讓我哋同佢一齊行呢條人生嘅道路。

呢種感覺，就好似睇住一個小朋友慢慢成長，睇住佢遇到挫折，再嘗試，再努力。

好有成功感。

我非常珍惜阿美。每次聽佢講佢嘅故事，我嘅心都會同佢一齊喜樂，一齊擔心。

* * * * *

不少義工都喺我嘅工作生涯中留下各種大大小小嘅痕跡。

因為佢哋，我嘅工作變得更有色彩。

雖然有啲色彩係因為吐血而造成...